တစ်ခါတုံးက အလေးမပြုလိုက်ရတဲ့ အာဇာနည်နေ့

တစ်ခါတုံးက အလေးမပြုလိုက်ရတဲ့ အာဇာနည်နေ့
by Ko Ko Maung on Wednesday, July 20, 2011 at 10:17pm

မနေ့ကအာဇာနည်နေ့မှာ အလုပ်လုပ်နေရင်းကနေဘဲ မြန်မာသတင်းတွေကို တောက်လျှောက်ဖွင့်ထားပြီး မြန်မာပြည်က အာဇာနည်နေ့ကို ငေးကြည့်နေရတယ်။ ဒီနှစ်အာဇာနည်နေ့ကို မြန်မာပြည်သူတွေပိုပြီး သတိတယနဲ့ သွားပြီး အလေးပြုတာတွေ့ရတော့ ဝမ်းသာပြီးမျက်ရည်ဝဲမိပါတယ်။ ကျွန်တော့်ရုံးကလဲ Facebook ကို Block လုပ်ထားတော့ ညနေအထိ ဘာမှမရေးဖြစ်ပါဘူး။ ညကျတော့လဲ အလုပ်ရှုပ်နေလို့မရေးဖြစ်ဘူး။

ဒီနေ့ညနေ အိမ်ပြန်ရောက်မှ သတင်းတွေဆက်ဖတ်၊ အာဇာနည်နေ့အမှတ်တရ သီချင်းတွေပြန်နားထောင် လုပ်ဖြစ်ပါတော့တယ်။ Weekly Eleven ရဲ့ Web Site ကိုပြန်ဝင်ကြည့်တော့လဲ မြန်မာပြည်ကလူငယ်တွေ ပိုပြီးစိတ်ဝင်စားတာတွေ့ရတော့ ဝမ်းသာမိပါတယ်။ ၁၆ ရက်နေ့ညကလဲ Gtalk ကနေတဆင့် မြန်မာပြည်မှာ ဒုတိယနှစ် ဆေးကျောင်းတက်နေတဲ့ တူမလေးနဲ့စကားပြောတော့ သူက အာဇာနည်နေ့သီချင်းတွေကို Download လုပ်လို့ရရင် မြန်မာပြည်ပြန်လာတဲ့အခါယူလာပေးဖို့ပြောလို့ ဝမ်းသာခဲ့ရတယ်။ ပြည်သူတွေကိုမေ့လျော့အောင် လုပ်ထားခြင်းခံရတဲ့ အာဇာနည်နေ့ဟာ မနေ့က ရန်ကုန်ကမြင်ကွင်းနဲ့တင် တော်တော်ကျေနပ်ရပါတယ်။ အခုတော့ ကျွန်တော်လဲ တူမလေးအတွက် Download လုပ်ထားတဲ့ သီချင်းတွေဖွင့်ရင်း စာရေးဖြစ်ပါတယ်။

ကျွန်တော်တို့ငယ်ငယ်က အာဇာနည်နေ့ကိုလည်း သတိယမိပါတယ်။ ကွယ်လွန်သွားပြီဖြစ်တဲ့ ကျွန်တော့်အဖေက နိုင်ငံရေးသာလုပ်တတ်သူ၊ တိုင်းပြည်ချစ်သူဆိုတော့ အာဇာနည်နေ့မရောက်ခင် တစ်လလောက်ဆို စပြီးပြင်ဆင်ကြတယ်။

ကျွန်တော်တို့ငယ်ငယ်ကအိမ်မှာ သံပတ်ပေးရတဲ့ ဓါတ်ပြားစက်နဲ့ ဗိုလ်ချုပ်ရဲ့ မိန့်ခွန်းဓါတ်ပြားတွေရှိပါတယ်။ ကျွန်တော်နဲ့ ကျွန်တော့်ရဲ့ညီလေးရဲ့တာဝန်က ဓါတ်စက်ထဲက ဗိုလ်ချုပ်မိန့်ခွန်းတွေကို ကျွန်တော်တို့မြို့လေးရဲ့ ရပ်ကွက်နေရာတိုင်းမှာဖွင့်ဖို့ ကက်ဆက်ခွေတွေထဲကို ကူးထည့်ပေးရပါတယ်။ ဟိုတုန်းကစက်တွေက ကူးရင် အမြန်မရပါဘူး။ အဲဒီတော့ ဗိုလ်ချုပ်မိန့်ခွန်းတွေကို အခေါက်မရေတွက်နိုင်အောင် အစအဆုံးနားထောင်ရတော့တာပါပဲ။

ကျွန်တော့်အဖေမှာ နောက်ထပ်စေ့စေ့စပ်စပ်လုပ်တတ်တာတစ်ခုရှိသေးတယ်။ အဲဒါက အသံကောင်းကောင်း၊ လော်စပီကာနဲ့ဆော်သြပေးနေကျ ဦးအောင်မွှေးကိုခေါ်ပြီး သီချင်းတွေ Back Ground ထည့်ပြီး သူ့အသံနဲ့ ပြည်သူတွေ ချီတက်အလေးပြုကြဖို့ဆော်သြတဲ့ အခွေလုပ်ပြီး အသံသွင်း၊ အခွေတွေပွားပေးရပါတယ်။ ဇူလိုင် ၁၈ ရက်ညကျတော့ တစ်မြို့လုံးကရပ်ကွက်တွေမှာ လော်စပီကာတွေကို ဝါးလုံးတွေနဲ့ထောင်ပြီး ည(၈)နာရီလောက်ကနေ (၁၀)နာရီ လောက်အထိ ကျွန်တော်တို့ကူးပေးခဲ့တဲ့ ဗိုလ်ချုပ်မိန့်ခွန်းတွေကို ဖွင့်ပေးကြပါတယ်။ ဇူလိုင် ၁၉ ရက် နံနက်စောစောမှ စောစောက လော်စပီကာတွေကနေ ကျွန်တော်တို့ဖန်တီးပေးထားတဲ့ အာဇာနည်နေ့ကိုချီတက်အလေးပြုဖို့ ပြည်သူလူထုကို ဆော်သြတဲ့အခွေကို ဖွင့်ပေးပါတယ်။

ရပ်ကွက်တိုင်းမှာ (၁၈)ရက်နေ့ညနဲ့ (၁၉)ရက်နေ့မနက်စောစောမှာ တစ်ညီတစ်ညာထဲကြားရတာပေါ့။ လွမ်းစရာကောင်းလိုက်တာ။ အဲဒီအလုပ်တွေကို ကျွန်တော်(၆)တန်းလောက်ကနေ (၁၀)တန်းအောင်တဲ့ ၁၉၈၆ အထိ နှစ်စဉ်လုပ်ခဲ့ပါတယ်။ နောက်တစ်ခု သတိယစရာက ကျွန်တော်တို့ညီအစ်ကိုက (၅)တန်းကထဲက ဘင်ခရာအဖွဲ့ဝင်တွေဆိုတော့ နှစ်တိုင်း အာဇာနည်နေ့ဆို ကန်တော်ကြီးကန်နားက အာဇာနည်ကျောက်တိုင်မှာ အာဇာနည်နေ့အလေးပြုဖို့ ရောက်လာတဲ့သူတွေကို နိုင်ငံတော်သီချင်း၊ ကျဆုံးလေပြီးသော အာဇာနည်ခေါင်းဆောင်တွေကို ဂုဏ်ပြုအလေးပြုချိန်မှာ ကျဆုံးခရာမှုတ်ပြီးအလေးပြုရပါတယ်။
အဲဒါကိုလည်း နှစ်စဉ်နှစ်တိုင်းလုပ်ခဲ့ရတာပေါ့။

မှတ်မှတ်ယယ ကျွန်တော် (၉)တန်းနှစ်မှာတော့ လူတကာအလေးပြုချိန်မှာ ကျဆုံးခရာမှုတ်ဖို့ကို ကျွန်တော်နဲ့ အခု လဝကမြို့နယ်မှူးဖြစ်နေသူ ကိုကျော်ဇင်တို့နှစ်ယောက်တာဝန်ကျပါတယ်။ ခါတိုင်းနှစ်တွေဆို သူများနည်းတူ အဲဒီအချိန်မှာအလေးပြုနေကျပါ။ အဲဒီနှစ်ကတော့ ရင်ကော့ပြီး ခရာမှုတ်ခဲ့ရပေမယ့် ကျွန်တော်မျက်ရည်တွေကျပြီး အလေးမပြုခဲ့ရပါဘူး။ အဲဒီနေ့မနက်မှာ မြို့မဈေးကဈေးသူဈေးသားတွေကလဲ အာဇာနည်များကိုရည်စူးပြီး ဘုန်းတော်ကြီးများပင့်ဖိတ်လို့ ဆွမ်းကပ်ကြပါသေးတယ်။

အခုပြန်တွေးတိုင်း၊ အာဇာနည်နေ့တိုင်း သတိယတတ်တဲ့ ကျွန်တော်တို့ငယ်ငယ်က မွန်ပြည်နယ်၊ မုဒုံမြို့ကလေးရဲ့ လွန်ခဲ့တဲ့ (၂၅)နှစ်ကျော်က အာဇာနည်နေ့ကို လွမ်းမောတမ်းတမိတာပါပဲ။ တစ်နေ့နေ့တော့ အဲဒီလို အာဇာနည်နေ့မျိုးကို ပြန်ဆုံရဦးမယ်လို့ ယုံကြည်ဆဲပါ။