ကျွန်တော့်ရဲ့နောင်တ .... မေခ၊ မလိခ နဲ့ မြစ်ကြီးဧရာဝတီ

နောင်တ ဆိုတဲ့အတိုင်း နောင်မှ တရ တာပါပဲ …. ဒီလိုပါ … နောင်တ ဆိုတာ အမျိုးမျိုးရှိပါတယ် …. ကိုယ်လုပ်သင့်တာ မလုပ်ခဲ့မိလို့ ရတဲ့နောင်တ …. ကိုယ်မလုပ်သင့်တာကိုမှ ရွေးလုပ်ခဲ့မိလို့ ရတဲ့နောင်တ …. အိုစုံနေတာပါပဲ …. အသက်ကြီးလာတာနဲ့အမျှ ရလာတဲ့နောင်တတွေကို ငွေလိုသာစုထားလို့ရရင် မဟာသူဌေးကြီး ဖြစ်နေလောက်ရောပေါ့ …

ကျွန်တော် ဒီကနေ့ပြောပြချင်တဲ့နောင်တက သွားသင့်တာကို အခွင့်အရေးလေးရတုံး မသွားခဲ့မိလို့ အခုလို (၁၆)နှစ် လောက်ကြာမှ ရတဲ့နောင်တ အကြောင်းပါ ….

ဧရာဝတီ …. သူနဲ့ပါတ်သက်ရင် ကျွန်တော်တို့လို အောက်ပြည်အောက်ရွာ မွန်ပြည်နယ်သားတွေက အနေနဲနဲစိမ်းတယ်လို့ ပြောရမယ်ထင်ပါတယ် … သံလွင်ကသာ ကျွန်တော်တို့နဲ့ ဖွားဖက်တော်လိုဖြစ်နေတာကိုး … ဒါပေမယ့်လည်းပဲ အရွယ်ရောက်သိတတ်စ အတန်းပညာသင်ကျောင်း စနေပြီဆိုတာနဲ့ သူ့အကြောင်းကို ကြားရတော့တာပါပဲ … ငယ်ငယ်က သူ့ကိုကိုယ်တွေ့ မမြင်ဖူးခင်ကထဲက သူနဲ့ပါတ်သက်ပြီး အကြိုက်ဆုံးသီချင်းတစ်ပုဒ်ရှိခဲ့ပါတယ် …

မြစ်ကြီးဧရာဝတီတဲ့ ….

ဧရာဝတီ … မြစ်ကြီး ဧရာဝတီ ….

နာမည်ကျော် အဆိုတော်ကြီး မေဆွိရဲ့မိခင် အဆိုတော်ရုပ်ရှင် မင်းသမီးကြီး ဒေါ်မြင့်မြင့်ခင်ဆိုတဲ့ အရမ်းနားထောင်လို့ကောင်းပြီး ကျွန်တော်တို့ငယ်ငယ်က ရေဒီယိုကနေ မကြာမကြာ လွှင့်ပေးတတ်တဲ့ သီချင်းထဲက စာသားလေးပါ ….

နောက်တော့ရော … ကျွန်တော်(၈)တန်းနှစ်လောက်မှာ အိမ်မှာ ကားစပါယ်ယာလုပ်တဲ့ ကမာဝက်ရွာသား ကိုဝင်းထွဋ် ဆိုတာရှိပါတယ် သူကဂစ်တာလေးလဲတီး …. ကိုခင်ဝမ်းရဲ့သီချင်းတော်တော်များများကိုဆိုတတ်တော့ မဟာသဘာဝရှင် ဧရာဝတီကို ထပ်ပြီး ရင်းနှီးရပြန်ပါတယ် …. နောက်ထပ်အသက်နဲနဲရလာတော့ ကိုထူးအိမ်သင်ရဲ့ ရာဇဝင်များရဲ့သတို့သမီး ငါတို့ရဲ့မိခင် ဧရာဝတီ ကိုဆုံရပြန်ပါတယ် …. အဲဒီလောက်အထိကတော့ သူနဲ့ သေသေချာချာ မပတ်သက်ဖူးသေးပါဘူး …

နောင်တရရတဲ့ အကြောင်းလေးမပြောခင် ဒီနောင်တနဲ့ပါတ်သက်တဲ့ ကျွန်တော့်အကြောင်းလေးပြောပြချင်ပါသေးတယ် …

ကျွန်တော့်က ၁၉၉၄ ဒီဇင်ဘာမှာ စိုက်ပျိုးရေးဘွဲ့နဲ့ ကျောင်းပြီးကထဲက လူသုံးဆေးတွေရောင်းတဲ့ Company မှာ ဝင်ပြီး အလုပ် လုပ်ခဲ့ပါတယ် … ကျောင်းလည်းအပြီး အလုပ်လည်းတန်းရဆိုပါတော့ … အဲဒီမှာ ကျွန်တော်က စစချင်းတော့ ရန်ကုန်မှာပေါ့ … အလုပ်ဝင်ပြီး (၄)လအကြာ ၁၉၉၅ မေလမှာ Mandalay မှာ ရုံးခွဲဖွင့်တော့ ကျွန်တော့်နဲ့ လုပ်ဖော်ကိုင်ဖက်(၃)ယောက်ကို အဲဒီမှာ သွားပြီးတာဝန်ထမ်းဆောင်ဖို့ Company က စေလွှတ်ပါတယ် … အဲဒီကထဲက ကျွန်တော်မြန်မာပြည် တစ်နံတစ်လျားကို ပတ်ပြီးသွားရတော့တာပါပဲ … Mandalay ကနေ မူဆယ်၊ တမူး၊ မြစ်ကြီးနား၊ မိုးကောင်း အိုစုံနေတာပါပဲ …

၁၉၉၅ မှာပါပဲ … ကျွန်တော်နဲ့ လုပ်ဖော်ကိုင်ဖက်ဖြစ်တဲ့ မဝါဝါခိုင်တို့ မြစ်ကြီးနားမြို့ကို ရထားစီးပြီး တစ်ခေါက် ရောက်ခဲ့ပါတယ် … အဲဒီတုံးက မြစ်ကြီးနားက ကျွန်တော်တို့ဆီကဆေးတွေ ဖြန့်ဖြူးနေတဲ့ ( ) ဆေးဆိုင်က ကိုအောင်ကြီးနဲ့ ကိုပေါက်ပေါက်က ကျွန်တော်တို့ကို ရောက်တုံးရောက်ခိုက် မေခနဲ့ မေလိခ မြစ်ဆုံကိုသွားလည်ဖို့ တိုက်တွန်းပါတယ် … အထူးသဖြင့်ကျွန်တော့်ကိုပါ၊ မဝါဝါခိုင်က တစ်ခေါက်ရောက်ဖူးပြီးသားကိုး …

မဝါဝါခိုင်ကလည်း မြစ်ဆုံရဲ့အလှအပတွေကိုပြောပြတာပေါ့ … ဒါနဲ့ကျွန်တော်လည်း မြစ်ဆုံကို ဘယ်လိုသွားရမလဲ? ဘယ်လောက်ဝေးလဲ? ဘယ်လောက်ကြာမလဲ နဲ့ ဘယ်လောက်ကုန်မလဲ? စတဲ့ လဲပေါင်းများစွာကို သူတို့တွေကို မေးကြည့်တာပေါ့ … ရတဲ့ အချက်အလက်က ကားနဲ့ဆိုမြန်မယ် … ပိုက်ဆံကုန်မယ် … စက်ဘီးနဲ့လဲသွားလို့ရသတဲ့ နဲနဲတော့ ဝေးတယ်တဲ့ … လမ်းမှာ သတိထားသွားရမယ်လို့လည်း ပြောသေးတာ … နောက်ပြီး ကားငှားပြီးသွား ရအောင်လည်း ကိုယ်က Company ဝန်ထမ်းလခစားဆိုတော့ မချမ်းသာ … ဒါနဲ့ပဲ မဝါဝါခိုင်နဲ့ ကျွန်တော် စက်ဘီး တစ်ယောက် တစ်စီးစီငှားပြီး မြစ်ဆုံကို စက်ဘီးစီးသွားမယ်ဆိုပြီး ထွက်ခဲ့ကြပါတယ် …

တစ်နာရီ တစ်နာရီခွဲ သာသာလောက် ခရီးရောက်တော့ ကရိန်နော်ဆိုတဲ့ ဧရာဝတီ မြစ်ကမ်းဘေးကိုရောက်ပါတယ် … အဲဒီမှာ စားသောက်ဆိုင်လေးတွေနဲ့ View Point ရှိတော့ ခဏလောက် နားရအောင်ဆိုပြီး အအေးဝင်သောက်တာပေါ့ … ကျွန်တော့်ဘဝမှာ ပထမဆုံးအကြိမ် မြစ်ရေကို ကြည်ကြည်လင်လင်မြင်ဖူးတာ အဲဒီမှာပါပဲ … ဧရာဝတီမြစ်ရေ ကြည်ကြည် လင်လင်ထဲမှာ ကျောက်တုံးကလေးတွေနဲ့ ကျွန်တော်တို့ မော်လမြိုင်ဖက် အောက်ပြည်စကားနဲ့ပြောရရင် လှမှလှပေါ့ …

ကျွန်တော်တို့ထွက်လာတာကိုက နောက်ကျနေတာဆိုတော့ အဲဒီကိုရောက်တဲ့အချိန်က မနက်(၁၀)နာရီလောက်ရှိပါပြီ… နောက်ပြီး ကျွန်တော်ဆိုတဲ့ အကောင်ကလဲ အလုပ်နဲ့သာ သွားလာနေရတာ အားတဲ့အချိန်ဆို နားနားနေနေ နေချင်တာကိုး … ဒါနဲ့ အဲဒီမှာ ထမင်းဆိုင်က ထမင်းမှာစား အအေးသောက်နဲ့ မွန်းတည့်(၁၂)နာရီလောက် ရောက်သွားပါလေရော …

စားသောက်ပြီးလို့ ဆက်သွားမယ်လုပ်တော့ ကျွန်တော်က မဝါဝါခိုင်ကို ဘယ်လောက်ထပ်သွားရမလဲ မေးတော့ သူက အခုမှ လေးပုံတစ်ပုံလောက်ရောက်သေးတာ နောက်ထပ်(၃)(၄) နာရီလောက်ဆက်စီးမှ ရောက်မယ်တဲ့ … ဒါနဲ့ကျွန်တော်ကလည်း တစ်ယောက်ထည်းဆို ပြသနာမရှိဘူး … သူက မိန်းကလေး ဆိုတော့ ပြန်မှဖြစ်မယ်ဆိုပြီး ကရိန်နော်ကနေပဲ လှည့်ပြန်ခဲ့ကြပါတယ် …

တကယ်တမ်းက ပိုက်ဆံနည်းနည်းစီ အကုန်ခံပြီး ကားငှားသွားလိုက်ရင် မြစ်ဆုံကိုသေချာပေါက်ရောက်တာပါ ….

ဒီလိုနဲ့ လှပတဲ့ မေခနဲ့မလိခတို့ပေါင်းဆုံရာ မြစ်ဆုံနဲ့ လွဲခဲ့ရပါတော့တယ် … စိတ်ထဲမှာတော့ တစ်နေ့နေ့ အခြေအနေပေးရင် ရောက်အောင်ပြန်လာမယ်ပေါ့ ….

ဒါကတော့ ကျွန်တော်နဲ့ မဟာသဘာဝအရှင် ဧရာဝတီရဲ့ ပထမဇာတ်လမ်းပါ …

နောက်တစ်ခါ ၁၉၉၈ ခုနှစ်ကုန်လောက်ရောက်တော့ ကျွန်တော်စဉ်းစားမိတယ် … ငါကတော့ ကိုယ်ရထားတဲ့ဘွဲ့နဲ့ လုပ်နေတာက တစ်ခြားစီဖြစ်နေပြီ … စိုက်ပျိုးရေးနဲ့သက်ဆိုင်တဲ့ အလုပ်တစ်ခုခုတော့ရှာပြီး ပြောင်းလုပ်မှ သင့်တော်မယ်လို့စဉ်းစားမိတယ် … ဒါနဲ့ အလုပ်ရှာတော့ အဆင့်မြင့် သီးနှံအခြောက်ခံ သိုလှောင်ရုံတွေကို မြန်မာပြည်မှာ စတင်မိတ်ဆက်ပေးမယ့် Myanmar Grain System ဆိုတဲ့ Company ကို ၁၉၉၉ ခုနှစ် ဇန်နာဝါရီလမှာ ကျွန်တော် အလုပ်ပြောင်းပြီး လုပ်ဖြစ်တယ် ဆိုပါတော့ …

အဲဒီ Company က ရန်ကုန်မြို့ ဆောက်လုပ်ရေးလောကမှာ အောက်ခံ Foundation ပိုင်ရိုက်တဲ့ Myanmar V Pile ရဲ့ Company ရဲ့ ကိုယ်ခွဲတစ်ခုပါ … ဆိုလိုတာက ဆောက်လုပ်ရေးနဲ့ ဆက်စပ်တဲ့ Company ဆိုတော့ ဝန်ထမ်းအများစုက အင်ဂျင်နီယာတွေပါ … အဲဒီတုံးက ဖြစ်ချင်တော့ Company ကလည်း ဧရာဝတီမြစ်ကြောင်း ထိန်းသိမ်းရေးအတွက် ကုန်ကျစားရိတ်တွေ တိုင်းတာဖို့ရှိနေချိန် .. ကျွန်တော်ကလည်း အစေ့ထုတ်ပြောင်းနဲ့ပါတ်သက်တဲ့ လိုအပ်တဲ့ အချက်အလက်တွေအတွက် ရှမ်းပြည်နယ်ကို သွားရဖို့ရှိနေတော့ ကျွန်တော်နဲ့ မြို့ပြအင်ဂျင်နီယာ ညောင်လေးပင်သား ကိုမျိုးသန့် (အခုတော့ မြန်မာ့အာမခံလုပ်ငန်း၊ ရာဖြတ်ဌာနမှာ တာဝန်ထမ်းဆောင်နေသူ)တို့ နှစ်ယောက်ကို ကားတစ်စီးနဲ့ လွှတ်လိုက်ပါတယ် …. အစီအစဉ်က ရှမ်းပြည် အောင်ပန်းဖက်ကို အရင်သွား … အဲဒီကနေ မကွေးကိုဖြတ်ဆင်းပြီး မြစ်ကြောင်းထိန်းသိမ်းရေးမှာ အလုပ်သမားခအပါအဝင် လိုအပ်တာတွေရဲ့ ဒေသဈေးနှုန်းတွေကို စုံစမ်းပြီး တွက်ချက်ကြဖို့ပါ …. ကျွန်တော်ကလည်း အစေ့ထုတ်ပြောင်းနဲ့ ပါတ်သက်တဲ့ စာရင်းအချက်အလက်တွေကို ရှာဖွေ စုဆောင်းဖို့ပေါ့ ….

လမ်းမှာ ကျွန်တော်လည်း ကိုမျိုးသန့်နဲ့ စကားတွေပြော ဆွေးနွေးကြတော့ နှစ်ပေါင်းထောင်သောင်းချီ ကျန်းကျန်းမာမာ နေလာရာက အဲဒီအချိန်ကထဲကစပြီး ဖျားနာစပြုနေတဲ့ ဧရာဝတီကို ကယ်တင်ဖို့ တစ်ချို့လိုအပ်တဲ့နေရာမှာ သောင်တူး၊ တစ်ချို့လိုအပ်တဲ့နေရာကြတော့ သောင်ဖြစ်အောင် ပြန်လုပ် စတဲ့ မြစ်ကြောင်းထိန်းသိမ်းရေးမှာ လိုအပ်တဲ့ လုပ်ပုံလုပ်နည်း နည်းစံနစ်တစ်ချို့ကိုသိခဲ့ရပါတယ် ….

မကွေးကနေ အောင်လံ၊ ပြည်စတဲ့ မြို့တွေကိုဖြတ်သန်းရင်း ဖျားနာစပြုနေတဲ့ ဧရာဝတီကို နဖူးတွေ့ဒူးတွေ့ မျက်မြင်ကိုယ်တွေ့ တွေ့ရပါတော့တယ် … အဲဒီတုံးကတော့ ဖျားနာစပြုနေတာတောင် ဧရာဝတီဟာ ခမ်းနားဆဲပါပဲ ….

ဒါကတော့ ကျွန်တော်နဲ့ မဟာသဘာဝအရှင် ဧရာဝတီရဲ့ ဒုတိယဇာတ်လမ်းပါ … ကျွန်တော်နဲ့ သူမရဲ့နောက်ထပ် ဇာတ်လမ်းတွေက အများသား …….

ဒီလိုနဲ့ အကြောင်းမညီညွတ်တော့ အဲဒီ Company ကနေထွက်ခဲ့ပြန်ပါတယ် …

၂၀၀၁ ဇန်နာဝါရီလမှာ ကျွန်တော် Japan နိုင်ငံက Sumitomo Corporation ရဲ့ ရန်ကုန်ရုံးခွဲအောက်က CropScience ဌာနအောက်မှာ Technical Coordinator အနေနဲ့ အလုပ်ဝင်ပြန်ပါတယ် …. လုပ်ရမှာက နိုင်ငံအနှံ့သွားပြီး စိုက်ပျိုးရေး ပိုးသတ်ဆေးတွေကို တောင်သူလယ်သမားတွေ နည်းစံနစ်တကျ သုံးစွဲတတ်အောင် ဟောပြောပို့ချဖို့ပေါ့ …

ဒီလိုနဲ့ ကျွန်တော်နောက်ထပ်တစ်ခါ အထက်မြန်မာပြည် တစ်နံတစ်လျားကိုပတ်ပြီး ခရီးတွေသွားရပါတော့တယ် …

နောက်တစ်ခါ ၂၀၀၂ ခုနှစ်ရောက်တော့ Sumitomo Corporation ကနေ အခုလက်ရှိလုပ်နေတဲ့ Company ရဲ့ ရန်ကုန် ရုံးခွဲကိုပြောင်းပြန်တော့လဲ ဒီလိုအလုပ်ပဲဆိုတော့ ခရီးသွားတာနဲ့ကျွန်တော် အသားကျလာခဲ့ပါတယ် ….

ပြောပြချင်တာက အဲဒီခရီးတွေမှာ မကြာခဏ ဧရာဝတီမြစ်ကို တံတားပေါ်က တစ်မျိုး၊ ကားတင်ကူးတဲ့ဖယ်ရီနဲ့ တစ်ဖုံ အကြိမ်ကြိမ်ဖြတ်ခဲ့ရပါတယ် … တစ်ခါတစ်ရံ မင်းဘူးဖက် ဧရာဝတီကမ်းနဖူးက ရွာတွေကိုရောက်ရင် နုံးတင်မြေနု သဲသောင်ပြင်အသစ်ပေါ်လာတဲ့အခါ စိုက်ပျိုးမြေလုကြလို့ ရွာသားတွေ ပြသနာတက်ကြတာတွေကိုလည်း ကြားရတတ် ပါတယ် …

ဧရာဝတီတိုင်းမှာလည်း ဟင်္သာတရောက်တော့ သူ့အနားပါပဲ၊ ပဲခုးတိုင်းမှာရော … ပြည်တစ်ဖက်ကမ်း ကံမမြို့ဖက် … အောင်လံ .. သရက် စုံနေတာပေါ့ … သူ့အနားပါပဲ …

တစ်ခါတုံးက ပုဂံကနေ ပခုက္ကူမြို့ဖက်ကို ကားတင်တဲ့ဇက်နဲ့ ဖြတ်ကူးနေတုံး ကိုထူးအိမ်သင်ရဲ့ အခမ်းအနားဆုံးသော သက်ရှိကဗျာ ဧရာဝတီကို တိုးတိုးလေးဆိုခဲ့ဖူးပါတယ် ….

တစ်ခါ ၂၀၀၅၊ ၂၀၀၆ တလျှောက်လုံးပြည်ဖက်ရောက်ပြန်တော့ ပြည်မှာရှိတဲ့ ကျောင်းတုံးက သူငယ်ချင်း အောင်သိန်းဦးနဲ့ မြစ်ကမ်းနံဘေးက စားသောက်ဆိုင်မှာထိုင်ဖြစ်ပါတယ် … ညနေ နေဝင်ကာစ မှောင်ပျပျမှာ သူ့ကိုတိတ်တိတ်ဆိတ်ဆိတ် ငြိမ်ငြိမ်ကလေးတွေ့ပြန်တော့ ကိုခင်ဝမ်းရဲ့ မြစ်မင်းနဲ့ အေးမြတဲ့မြောက်လေကြောင်းပေါ်က မိုးမချုပ်မီ အိမ်ပြန်မယ့် ငှက်ကလေးတွေကို ငေးရင်း ကိုခင်ဝမ်း သီချင်းကို ဆိုရပြန်ပါတယ် …….

ဒီလိုနဲ့ပဲ ဆရာအော်ပီကျယ်ပြောသလို ကျွန်တော်တို့ ပျော်ရာကို တော်ရာဖြစ်အောင် တစ်ဖက်တစ်လမ်းက ကြိုးစားကြည့်ရင်း နေလာခဲ့တာ ၂၀၀၈ ခုနှစ်ကို ရောက်တဲ့ အထိပါပဲ ….

ဒါပေမယ့်လည်း ပျော်ရာကနေ တော်ရာဖြစ်မလာသေးတော့ ကျွန်တော်နဲ့ ကျွန်တော့်မိသားစုလည်း လောလောဆယ် တော်ရာဖြစ်တဲ့ စကာင်္ပူကို ပြောင်းလာခဲ့ရပါတော့တယ် …

ဘာပဲပြောပြောပေါ့ …. ကျွန်တော်တို့ဇနီးမောင်နှံကတော့ တစ်နေ့မှာသားတော်မောင် သူ့ခြေထောက်ပေါ်မှာသူ ရပ်နိုင်ပြီဆိုရင် ကျွန်တော်တို့ ပျော်ရာမှာ အေးအေးချမ်းချမ်းပြန်နေဖို့ နေ့စဉ်စိတ်ကူးနေဆဲပါပဲ … တစ်နေ့နေ့တော့ မြစ်ဆုံကို အေးအေးလူလူ သွားလည် ဦးမယ်ပေါ့ …. စိတ်ကူးတွေပါ ……….

အခုမှ ကျွန်တော့်ရဲ့နောင်တအကြောင်းပြောပြရတော့မယ် … ကျွန်တော့်မှာ အကျင့်တစ်ခုရှိပါတယ် အဲဒါကတော့ မနက်ရုံးသွားတိုင်း ညကထုတ်လွှင့်သွားခဲ့တဲ့ မြန်မာသီတင်းတွေကို ဖုန်းထဲက Podcast ကနေ Download လုပ်ပြီး ကားပေါ်မှာ နားထောင်သွားတာပါ … ဒီနေ့မနက်တော့ မြစ်ကြီးနားကထင်ပါတယ် လူုငယ်ဓါတ်ပုံဆရာတစ်ယောက်နဲ့ အင်တာဗျူးမှာ မြစ်ဆုံဟာ အရင်လိုမဟုတ်တော့ပါဘူးတဲ့ …. ကြည်လင်တဲ့ရေ …. လှပအေးချမ်းမှုတွေ …. အို ဘာမှပြန်မရတော့ပါလား ….

လွန်ခဲ့တဲ့ (၁၆)နှစ်လောက်က သွားခဲ့ရင် ရောက်နိုင်ခဲ့ပေမယ့် …. ဘာပဲပြောပြော တစ်နေ့နေ့တော့ မေခနဲ့မလိခ ပေါင်းဆုံရာ မြစ်ဆုံဆိုတာကို အေးအေးလူလူ သွားလည်မယ်ဆိုတဲ့ ကျွန်တော့်ရဲ့အိမ်မက်တွေ ….

ကျွန်တော်တို့ ပျော်ရာပြန်နေနိုင်တဲ့တစ်နေ့ နှစ်ပေါင်းထောင်သောင်းချီပြီး ကျန်းကျန်းမာမာ ပျော်ပျော်ရွင်ရွင် မြန်မာ တစ်နိုင်ငံလုံးနဲ့ မခွဲအတူနေခဲ့တဲ့ …. မိခင် …….. ဧရာဝတီ …. သူ့ကိုရောအသက်ရှင်လျှက် ပြန်ဆုံချင်ပါသေးတယ် ……….